ШЫМКЕНТ. 15-наурыз. Kazakhstan Today. Оңтүстік Қазақстан облысында ВИЧ індетін жұқтырған балалардың саны 96-ға жетті. Бұл туралы Оңтүстік Қазақстан облыстық денсаулық сақтау департаментінің баспасөз хатшысы Айжан Омарова мәлімдеді, деп хабарлайды Kazakhstan Today тілшісі. "Тағы екі баланың ВИЧ індетін жұқтырғандығы анықталып отыр: біреуі, 2002 жылы туған Сайрам ауданынан, екіншісі Түркістанда 2003 жылы дүниеге келген",- деп хабарлайды баспасөз хатшысы. А. Омарованың сөздеріне сүйенсек, Сайрам ауданынан келген бала Қарабұлақ ауылының ауруханасында "өкпенің қабынуы, туадан жүрек ақауы" диагнозымен емделген. Одан кейін ол осы диагнозбен бес рет облыстық балалар ауруханасында емделген. Баланың анасы ВИЧ індетін жұқтырмаған.